Дилатро гар ҳаҷар гуфтем

Дилатро гар ҳаҷар гуфтем, гуфтем,

Кадатро гар шаҷар гуфтем, гуфтем.

Хататро мушк агар хондем, хондем,

Қадатро сарв агар гуфтем, гуфтем.

Бигуфтемат, ки дорӣ то камар мӯй,

Зи мӯят то камар гуфтем, гуфтем.

Зи бод он дам, ки зулфат гашт дархам,

Зи мавҷаш гар шамар гуфтем, гуфтем.

Чу гаштӣ з-он лаби ширин шакарбор,

Лабатро гар шакар гуфтем, гуфтем.

Намудӣ чун ба мо рухсору абрӯ,

Гарат Шамсу Қамар гуфтем, гуфтем.

Чӣ шуд гар ту рақиберо, ки хоҳӣ,

Гадои дар ба дар гуфтем, гуфтем.

Туро дар маҷлиси риндони олам,

Агар тоҷи гуҳар гуфтем, гуфтем.

Чу Ҳофиз холи худро бо даҳонат,

Ба ваҷҳи мухтасар гуфтем, гуфтем.

Facebooktwittergoogle_plusredditpinterestlinkedinmail