ШИРИН, ШИРИН

(Суруд)
Ширин, ширин,
Ширинтарӣ аз ҷони ширин.
Ширин, ширин,
Ширинакам ба паҳлуям шин.

Ба дил ҷо шав, ки ғам аз дил барояд,
Табассум кун, ки ғам дигар наояд,
Ҳамеша ду дили якгаштаи мо
Суруди шодии моро сарояд.
Н а қ а р о т:
Дароӣ дар гулистон мисли булбул.
Ба рақс ояд гули садбаргу сунбул.
Чӣ сон гул бе ту хандад дар гулистон,
Туӣ, эй нозанинам, чеҳраи гул.
Н а қ а р о т:
Ба бахти мову ту, эй дилбари ҷон,
Ҳамеша сабзу хуррам шаҳри пуршон,
Накардаст одат ин шаҳри азизам
Ки бе ту по ниҳам дар кучаи он.
На қ а ро т:
Маҳи Шуғнон, ҳамеша гул ба сар бош,
Ба фарқам ҷовидонӣ ҷилвагар бош.
Нависад Миршакар дар васфи ту шеър,
Ба вай илҳомбахши боҳунар бош!

Facebooktwittergoogle_plusredditpinterestlinkedinmail
Close