ЗИНДАРӮДУ ПАНҶРӮД

Зи рӯди Рӯдакӣ бувад
Суруди мо, дуруди мо.
Зи риштаи сухан бувад
Бақои тору пуди мо.
Тулӯи меҳри ҷовидон –
Замини бошу буди мо.
Суруди Панҷрӯдро
Зи Зиндарӯд бишнавем.
Дуруди Зиндарӯдро
Зи Панҷрӯд бишнавем.
Биё, суруд бишнавем,
Биё, дуруд бишнавем –
Суруде аз ягонагӣ,
Дуруди ҷовидонагӣ.
Зи боғи меҳри мо дамад
Ҷавонаҳо, ҷавонаҳо.
Зи мағзи ҷони мо расад
Таронаҳо, таронаҳо.
Бувем бар канори ҳам
Ба саҳни бекаронаҳо.
Суруди Панҷрӯдро
Зи Зиндарӯд бишнавем.
Дуруди Зиндарӯдро
Зи Панҷрӯд бишнавем.
Биё, суруд бишнавем,
Биё, дуруд бишнавем –
Суруде аз ягонагӣ,
Дуруди ҷовидонагӣ.
9.8.1992

Facebooktwittergoogle_plusredditpinterestlinkedinmail